Кыргызпатент Манас күнүнө карата Манас таануу боюнча онлайн лекциясы өткөрдү

Бүгүн, 20-ноябрда Кыргыз Республикасынын Өкмөтүнө караштуу Интеллетуалдык менчик жана инновациялар мамлекеттик кызматы (Кыргызпатент) 4-декабрь Манас күнүнө карата Манас таануу боюнча онлайн лекция өткөрдү.

Кыргыздын улуу эпосу “Манас” тууралуу лекцияны Б. Бейшеналиева атындагы КММИнин салттык музыка жана фольклор кафедрасынын башчысы, Т. Сатылганов атындагы кыргыз улуттук филармониясынын артисти, белгилүү манасчы Самат Көчөрбаев алып барды. Лекция Zoom платформасында өткөрүлүп, Кыргызпатенттин 80ден ашуун кызматкери катышты. Кыргызпатенттин фейсбуктагы баракчасынан 1000 жакын киши түз эфирде онлайн лекцияга күбө болушту.

Лекциянын жүрүшүндө манасчы С. Көчөрбаев “Манас” эпосунун улуулугун,  артыкчылыгын көрсөтүп, Манас айтып, эпостун мазмунунан жалпы кыргыздын улуттук идеологиясын алса боло тургандыгын, азыркы учурдагы өлкөбүздө болгон окуяларга салыштыруу менен баяндады. Өз сөзүндө манасчы Кыргызпатент менен көп жылдан бери иштешип келе жаткандыгын, эмгек жамаатынын “Манас” эпосуна болгон өзгөчө мамилесин баса белгиледи. Угуучулар менен  манасчынын ортосунда суроо-жооп орун алып, катышуучулар мыкты лекция үчүн манасчыга ыраазычылык билдиришти. Жыйынтыгында суроолор боюнча кайрадан манас айтылды.

Иш-чара Кыргыз Республикасынын маданият, маалымат жана туризм министрлигинин “4-декабрь Манас күнүнө карата мамлекеттик мекемелерде Манас таануу лекцияларын өткөрүү” боюнча демилгесинин алкагында өткөрүлдү.

Онлайн лекциянын видеосу: https://youtu.be/9PthHu7ures

Поделиться ссылкой:

Comments are closed.