Жаңылыктар

Бүгүн, 20-январда Кыргызпатент, И. Раззаков атындагы Кыргыз мамлекеттик техникалык университети, “Ками Моторс”, “Апар сервис”, “Афис”, “группа К51” ачык акционердик коомдору кызматташуу тууралуу көп тараптуу меморандумга кол коюшту.

Меморандумга кол коюунун максаты – илимий-изилдөөчүлүк, тажрыйбалык-конструктордук иштерди  түзүү, өнүктүрүү жана ишке ашыруу, интеллектуалдык менчиктин жана инновациялардын натыйжаларын өнүктүрүү жана ишке ашыруу.

Тараптар интеллектуалдык менчик жаатында билим берүү программаларын жакшыртуу, биргеликте илимий, кесиптик билим берүү, илим, технология, бизнес түзүмдөрүнүн өз ара аракеттенүүсүнүнүн инновациялык формасын өнүктүрүү жаатында кызматташат.

Бүгүн, 11-январда Кыргызпатенттин директору Р. Керимбаева Венгриянын Кыргыз Республикасындагы элчиси Шандор Дороги менен жолукту.

Жолугушуунун жүрүшүндө тараптар инновациялар жана стартап экосистемасын өнүктүрүү жаатында эки тараптуу кызматташтыкты талкуулашты.

Кыргызпатенттин директору Р.Керимбаева жалпы инновация, анын ичинен инновацияга багытталган аймактагы жаштарды окутуу боюнча кызматташтыкты кеңейтүүнү сунуштады. Мындан сырткары, Венгриялык адистердин катышуусунда Кыргыз Республикасында инновациялык ишмердикти жайылтуу боюнча иш-чараларды уюштуруу маселесин ортого салды.

Венгриянын элчиси Шандор Дороги Венгрияда инновациялар маселесин Инновациялар министрлиги карай тургандыгын белгилеп, дал ушул тармактагы кызматташтык Кыргыз Республикасы менен Венгриянын ортосундагы эки тараптуу кызматташтыктын келечектүү багыты болуп калышы мүмкүн экендигин билдирди.

Жыйынтыгында Р. Керимбаева элчини Кыргызпатенттин Инновациялык борборуна келип кетүүгө чакырды.

2021-жылдын 23-декабрында онлайн форматта Укук ээлеринин коомдоштуктарынын Евразиялык конфедерациясынын (УЭКЕАК)  башкы Ассамблеясынын кезектеги отуруму өткөрүлдү.

Отурумдун жүрүшүндө УЭКЕАКнын башкы катчысы Б. Кричевский тарабынан УЭКЕАКнын 2020-2021-жылдардагы ишмердиги тууралуу отчет берилди жана 2022-жылга ишмердик стратегиясы каралды.

Күн тартиби боюнча УЭКЕАКнын  башкы Ассамблеясынын башкы директорлугуна (бир жылдык мөөнөткө) талапкерлерди көрсөтүү маселеси да каралды.

Кыргызпатент тарабынан экономика илимдеринин доктору, Б. Бейшеналиева атындагы Кыргыз мамлекеттик маданият жана искусство университетинин ректору Мамашарип Чотоновдун талапкерлиги көрсөтүлдү. Катышуучулар Кыргызпатент көрсөткөн талапкерди бир добуштан колдоп беришти.

Башкы Ассамблеяга Беларусь, Молдова Республикасынын интеллектуалдык менчик чөйрөсүндөгү ведомстволордун өкүлдөрү, Россия Федерациясынын, Казакстан, Өзбекстан, Туркия жана Молдова өлкөлөрүнүн автордук коомдорунун өкүлдөрү катышты. Катышуучулар укуктарды жамааттык башкаруу боюнча 2020-жылдын жыйынтыктары боюнча отчетторду беришип, азыркы учурдагы абал жана жаңы тенденцияларды талкуулашты.

Бүгүн, 22-декабрда Түркиянын кызматташтык жана координациялоо боюнча агенттигинин (ТИКА) кеңсесинде Кыргызпатенттин  директору Р. Керимбаева менен  ТИКАнын Кыргыз Республикасындагы программалык координатору Осман Устанын жолугушуусу болуп өттү.

Жолугушуунун жүрүшүндө Р. Керимбаева Кыргызпатенттин интеллектуалдык ишмердикти жана инновациялык идеяларды өнүктүрүүгө багытталган долбоорлору тууралуу айтып берип, “40 райондон – 40 демилге” долбоору жана аймактарда инновациялык борборлорду ачуу идеялары менен бөлүштү.

Осман Уста Кыргызпатенттин ишмердигинин маанилүүлүгүн белгилеп, ТИКА тарабынан ишке ашырылган, пландалып жаткан долбоорлору тууралуу маалымат берди.

Пикир алмашуудан кийин тараптар мындан ары биргелешип аракеттенүүгө жана кызматташууга даяр экенин билдиришти.