Жакында! «StartUP Кыргызстан» республикалык сынагынын Финалы өткөрүлөт

1-июль күнү, саат 13:00дө, жылдын башкы окуясы болгон «StartUP Кыргызстан» республикалык сынагынын Финалы өткөрүлөт!

Мыкты стартап сынагынын өзгөчөлүгү – экономиканын негизги тармактары боюнча мамлекеттик колдоо жана инновациялык долбоорлорду илгерилетүү.

Жеңүүчүлөр өз долбоорлорун өнүктүрүү үчүн Кыргыз Республикасынын Өкмөтүнө караштуу Интеллектуалдык менчик жана инновациялар мамлекеттик кызматы (Кыргызпатент) тарабынан бөлүнүүчү 500 000 сомго чейинки грант алышат.

Мыкты стартаптарга акысыз түрдө Кыргызпатенттин Инновациялык борборунун жаңы имаратынан пайдалануу үчүн офис, мындан сырткары, ылдам прототиптештирүүчү Fab Lab лабораториялык жабдыктарды жана башка керектүү инфраструктураны колдонуу мүмкүнчүлүгү берилет.

Эскерте кетсек, Кыргызпатент Мыкты стартаптарга сынак жарыялап, Кыргызстандын жаңы ишин баштап жаткан стартапчыларга өз эшигин ачкан. Алгачкы этапта, сынактык комиссия келип түшкөн 320 өтүнмөнүн ичинен 30 долбоорду акселерациялык программадан өтүү үчүн тандап алган. Аталган программаны эл аралык тажрыйбалуу устаттар коштоп, ар бир стартап үчүн трекерлер бекитилген. Стартапчылар өз долбоорлорун илгерилетүү, бизнес-план жазуу боюнча практикалык шыкка ээ болушуп, патенттер жана интеллектуалдык менчик объектилери, киреше үчүн салык тууралуу билим алышты. Сатып алуучу менен эффективдүү диалогду түзүүгө көмөктөшкөн CRM-системалары (Customer Relationship Management) сыяктуу электрондук ресурстардын ишин жандандырууну үйрөнүштү.

Финалистердин долбоорлорун Грузия, Россия, Беларусь жана Казакстан өлкөлөрүнүн эл аралык эксперттери, бизнес жана донордук уюмдардын өкүлдөрүнөн түзүлгөн калыстар тобу баалашат.

Сынактан күтүлүүчү эң башкы үмүт – экономиканын өсүшүнө олуттуу таасир тийгизе алган инновациялык бизнес.

Жылдын башкы окуясын өткөрүп жибербеңиз! Финал Кыргызпатенттин социалдык тармактардагы Facebook, Instagram баракчаларынан жана YouTube каналынан түз эфирде көрсөтүлөт.

Поделиться ссылкой:

Comments are closed.