«УЛУУЛАРДЫН МУРАСЫ УРПАКТАРГА» – МУУНДАР БАЙЛАНЫШЫ

 2018-жылдын 29-ноябрында Кыргыз Республикасында  Тарых жана ата-бабаларды эскерүү иш-чараларынын жана «Эне тил жана Айтматов» үч айлыгынын алкагында «Улуулардын мурасы урпактарга» – муундар байланышын улантуу максатында Кыргызпатент атактуу акын-жазуучулар менен борбор калабыздын студенттеринин жолугушуу кечесин уюштурду.

Анда залкар жазуучунун замандаштары Кыргыз Республикасынын Эл жазуучусу Мелис Абакиров, Кыргыз Республикасынын Эл акыны, Интеллектуалдык менчиктин Бүткүл дүйнөлүк уюмунун Алтын медалынын ээси Төлөгөн Мамеев, Кыргыз Республикасынын эл акыны Гүлсайра Момунова, Кыргыз Республикасынын Эл артисти Дарика Жалгасыновалар катышып, Чынгыз Айтматов жөнүндө кенен-кесири эскеришип, ал жөнүндө жазган китептерин баалуу белек катары катышуучуларга тартуулашты.

Кечеге катышкан заманыбыздын залкар инсандарын Кыргызпатенттин статс-катчысы Талант Абдыкадыров катышуучуларга тааныштырып атып, жаш муундарга айта жүрчү тарбиялык кеңештерин берип, ата-баланын, муундардын байланышын, тил тагдыры тууралуу маек куруп берүүгө чакырды.

Иш-чаранын жүрүшүндө китеп сүйүүчүлөргө белгилүү кино ишмери Бекболот Айдаралиевдин Чынгыз Айтматовдун бала чагы жана анын апасынын элесине арналган «Менин сөзүмдү менин жаным деп бил» аттуу даректүү фильм көрсөтүлдү. Айта кетчүү нерсе, Чынгыз Айтматовдун өмүр жолу, чыгармачылыгы жөнүндө гана сөз кылышпастан, жогоруда аталган белгилүү инсандар эгемен мамлекетибиздин кечээгиси, бүгүнкүсү жана келечеги тууралуу да кеңири маек куруп беришти. Студенттер активдүү катышып, өз суроолоруна толук жооп алышып, атактуу инсандардын атынан кол тамгалары түшүрүлгөн баалуу китептерге ээ болушту.

Кечеге келген акын жазуучулардын ар бири мамлекеттик тилибиздин келечегине жан күйгүзгөн, заманыбыздын залкар жазуучусу Чынгыз Айтматов менен бирге иштешкен, кыргыз адабиятынын келечегин аныктаган улуу инсандар. Кеченин соңундагы акын-жазуучулардын окурмандардын суроолоруна берген кызыктуу жооптору мындай кечелердин көбүрөөк болушун шарттайт жана китепканынын окурмандарынын көбөйүшүн өбөлгөлөйт деген ойдобуз.

Маалымдама:

Кыргызпатент жыл ичинде Ч. Айтматовдун 90 жылдыгын белгилөөнүн алкагында бир катар чоң иш-чараларды өткөрдү:

– И. Арабаев атындагы Кыргыз мамлекеттик университетинде “Чынгыз Айтматовдун чыгармаларынын жаштарды тарбиялоодогу ролу” форуму. Ага коомдук ишмерлер, окумуштуулар, жаштар жана чет элдик окумуштуулар келип катышты;

– “Айтматов ааламы” Кыргызстандын көркөм өнөрүндө” деген жаш сүрөтчүлөр арасында республикалык сынак. Бул сынактын жыйынтыгында жаш сүрөтчүлөрдүн мыкты эмгектери атайын альбом-каталогго топтоштурулуп, басмадан чыгарылды;

– Чыңгыз Айтматовдун чыгармаларынын негизинде тартылган кинофильмдердин өтө сейрек кездешүүчү кадрлары, Айтматов негиздеген “Ысык-Көл форумунан” алынган тарыхый сүрөттөр тандалып, туруктуу көргөзмөгө коюлду;

– Мамлекеттик патенттик-техникалык китепкананын “Ала-Тоодон ааламга үн салган Айтматов” тематикалык  көргөзмөсүнөн Айтматовдун чыгармалары, ага жазылган сын-пикирлер, башка тилдеги котормолору коюлду;

– “Эне тил жана Айтматов” үч айлыгынын алкагында иш-чаралар планы түзүлүп, кызматкерлер Айтматовдук окууларды өткөрүштү, тузүмдүк бөлүмдөр арасында сынак уюштурулуп, Кыргызпатенттин кызматкерлери өз алдынча кыскача видео чыгырыктарды тартып, социалдык тармактарга жайгаштырышты;

– Ошону менен бирге үстүбүздөгү жылдын 11-декабрында К. Карасаев атындагы Бишкек Гуманитардык университетинде “Биз дүйнөнү өзгөртөбүз, дүйнө бизди өзгөртөт” аталышындагы илимий конференция уюштурулууда, анда  сүрөт, китеп жана жаш техниктердин көргөзмөлөрү коюлуп, Айтматовдун басып өткөн жолу тууралуу баяндамалар жасалмакчы;

– Андан сырткары Кыргызпатентте “Эне тил жана Айтматов” бурчу уюштурулуп, анда жазуучунун чыгармаларында кездешкен эне тил тагдырына кооптонуп, элдин тагдырындагы эне тилдин ролу жөнүндө ой-толгоолору келтирилди. Аларды окуган адамды ойго салат. Так ушул максат менен кызматкерлердин эне тилди билишине, мамлекеттик тилди мындан ары өркүндөтүүгө түрткү берери шексиз.

 

Гүлбара Кудайбердиева,

Кыргызпатенттин басма сөз катчысы

Comments are closed.