Биринчи жолу аймактарда ойлоп табуучулук экспресс-мектеп ачылды

2018-жылдын 1-ноябрында аймактарды өнүктүрүү жылынын алкагында Кыргыз Республикасынын Өкмөтүнө караштуу Интеллектуалдык менчик жана инновациялар мамлекеттик кызматынын алдындагы  (Кыргызпатент) Интеллектуалдык менчик мамлекеттик фонду “Алтын түйүн” балдар академиясы менен биргелешип Баткен областындагы Кадамжай шаарынын балдар чыгармачылык борборунда  жогорку класстын окуучулары жана мугалимдери үчүн ойлоп табуучулук-компьютердик экспресс-мектебинин ачылышын өткөрдү.

Максат – мектеп окуучуларынын билимин жана жөндөм-шыктарын ар тараптуу калыптандыруу, техникалык-чыгармачылык аркылуу ой жүгүртүүлөрүн өстүрүү, кыял-элестөөлөрүн өнүктүрүү, жаңы идеяларды жана рационализатордук сунуштарды персоналдык компьютердин жардамы менен ишке ашыруу, келечектеги мыкты долбоорлорду иштеп чыгууга багыттоо болуп саналат.

Иш-чаранын жүрүшүндө “Интеллектуалдык менчик деген эмне?” презентациясы сунушталып, Интеллектуалдык менчик мамлекеттик фондунун 20 жылдыгына  арналган даректүү фильм көрсөтүлдү.

Күндүн экинчи жарымында практикалык иш-чаралар өткөрүлдү. Анда ойлоп табуучулук, жаратмандык жаатында,  компьютердик графика, макеттештирүү боюнча мастер-класстарды уюштуруп, тажрыйбаларын ортого салышты. Уюштуруучулар окуучулардын бүйүрүн кызыткан кызыктуу суроолорго жооп беришти.

Аталган иш-чарага Кадамжай  шаарынан 30 окуучу, балдар чыгармачылык борборлору, мектеп жана ийрим жетекчилери, Кыргызпатенттин кызматкерлери, ММК өкүлдөрү катышты. Бул жерде билимге ынтызар окуучуларга, кызыктуу ойлору менен бөлүшүүгө даяр мугалимдерге, белгилүү окумуштууларга техникалык жабдык жагынан камсыз кылган “Семетей” мектебинин эмгек жамаатына ыраазычылык билдирип кетебиз.

Ойлоп табуучулук-компьютердик экспресс-мектеп жогоруда белгиленген тематикалар боюнча 5-ноябрга чейин ишин жүргүзүп, андан ары Кыргыз Республикасынын башка региондорунда да улантыла бермекчи.

Кыргызпатенттин басма сөз катчысы

Гүлбара Кудайбердиева

Comments are closed.